शिवश्रावणसप्तकम्

नमोनमश्शीतांशुशीर्षधारकाय शूलिने

भुजंगभूषणाय चारुचर्मधारकाय ते,
सुरार्चिताय भक्तिभाविताय दुःखनाशिने।
भवस्य भेषजाय लोकपालकाय शम्भवे,
नमोनमश्शिवाय सर्वभूतरक्षकाय ते।।१

स्मरारये पुरारये हराय दैन्यहारिणे,
धनप्रदाय दैन्यदारकाय शंकराय ते।
गजेन्द्रकृत्तिवस्त्रधारकाय भास्वराय ते,
नमोनमश्शीतांशुशीर्षधारकाय शूलिने।।२।।

अजाय शाश्वताय पावनाय शूलपाणये,
मृडाय शंकराय पार्वतीश्वराय योगिने।
धनुर्धराय नाग-यक्ष-भूत-पूजिताय ते,
नमोनम: महोक्षरोहणाय लोकसाक्षिणे।।३

प्रदोषपूजनप्रियाय शत्रुमर्दकाय ते,
जटाधराय शैलमण्डिताय सर्वदायिने।
त्रिपुण्ड्रमस्तकाय दीनवत्सलाय सर्पिणे,
त्रिनेत्रकाय भक्तभीतिहारकाय ते नम:।।४।।

नमांसि चार्पयामि ते न दर्शये: कठोरतां,
श्रितोSस्मि भक्तिभावपूर्णमानसेन ते पदम् ।
जवेन एहि मामकीं निहन्तुमत्र वैवशीम्
प्रभो! न पश्यसीह किं मदीयदुःखदुर्दशाम्?।।५।।

समन्ततस्सुराश्च सन्ति किंकरा: शिवस्य ते,
ह्यतो निशम्यते न क्रन्दनं भृशं त्वयात्र मे।
कृपाबुभुक्षितोSस्म्यहं गणेशवत्तवाङ्कके,
प्रभो! स्व-सेवकस्य वेदनामिमां विभावये:।।६।।

दयां विना निपीड्य मामिहातुरं जहासि किम्?
विभो! मदीयदुर्दशां विलोकितुं क्षमोSसि किम्?
सुखं मदीयकष्टके त्वया विभाव्यतेSत्र किम्?
मनोSपि ते दुनोति पीडिते सुते न वेद्मि किम्?।।७।।