नवगीतिकाः

अश्रुभिराचमनं करणीयं भवति कथं मित्र ! जीवनमभिशप्तं वरणीयं भवति कथं मित्र ! गतो वसन्तः पुनर्नागतः श्रीहीनं सदनम्, अश्रुपूरिते नयने तरले हृदि करुणाकलनम् भग्नस्वप्नकुलं चयनीयं भवति कथं मित्र ! अधरे मृषास्मितं धरणीयं भवति कथं मित्र ! कृताःप्रार्थनाः शुभं काक्षितं सुखं वाञ्छितं किं जीवनमखिलं वरं प्रार्थितं शिवं कल्पितं किं परमधुना दुःखं वरणीयं भवति कथं मित्र ! द्वन्द्वं... Read More

जयतु संस्कृतम्, संस्कृत
डॉ. लक्ष्मीनारायण पाण्डेय

दैनन्दिन्याः पृष्ठम्

सुप्रभातम्

अश्रुभिराचमनं करणीयं भवति
कथं मित्र !
जीवनमभिशप्तं वरणीयं भवति
कथं मित्र !

गतो वसन्तः पुनर्नागतः
श्रीहीनं सदनम्,
अश्रुपूरिते नयने तरले
हृदि करुणाकलनम्
भग्नस्वप्नकुलं चयनीयं भवति
कथं मित्र !
अधरे मृषास्मितं धरणीयं भवति
कथं मित्र !

कृताःप्रार्थनाः शुभं काक्षितं
सुखं वाञ्छितं किं
जीवनमखिलं वरं प्रार्थितं
शिवं कल्पितं किं
परमधुना दुःखं वरणीयं भवति
कथं मित्र !
द्वन्द्वं मनसि सदाचरणीयं भवति
कथं मित्र !

काराकीलितमहो जीवनं
कालोSयं कुरुते,
स्नेहशीलसौन्दर्यदर्शनं
पुस्तकेषु लभते,
कूटजटिलतन्त्रं सरणीयं भवति
कथं मित्र !
भोगभवनमधुना रमणीयं भवति
कथं मित्र !

भाग्ये मधुव्रतानां केन
गरलं यल्लिखितम्
काव्ये ललितजीवनं किन्तु
प्रत्यक्षे स्खलितम्
अन्तरभीप्सितमनुसरणीयं भवति
कथं मित्र !
बहिरनपेक्षितमनुकरणीयं भवति
कथं मित्र !

जटिलःप्रश्नः द्वारे नव्यः
प्रतिदिनमायाति
समयश्चैकं दुःखनवीनं
मन्दं प्रददाति ,
समरजीवनं तत्करणीयं भवति
कथं मित्र !
विजिगीषयाधुना तरणीयं भवति
कथं मित्र !

वायुर्वाति नदी निर्गच्छति
परिवर्तनमनिशम्
आयुःश्वासदलैःलिखतीह
रेखाकर्मफलम्
प्रतिक्षणं पुरतो गमनीयं भवति
कथं मित्र !
पुनरेकाकी सञ्चरणीयं भवति
कथं मित्र !