जयति राधिका प्रेमसाधिका

रुचितचारुचन्दोच्चयप्रभा
चटुलनन्दजप्राणवल्लभा।
त्रिभुवनेश्वरी लासवल्लरी
जयति राधिका प्रेमसाधिका ।।1।।

नवलनीलनालीकशाटिका
कमनकृष्णभृङ्गेष्टवाटिका।
सुरसपायिका रासनायिका
जयति राधिका प्रेमसाधिका ।।2।।

हृदयहृन्मुकुन्दानुगामिनी
कुवलदन्तभादीर्णदामिनी।
प्रभवभामिनी कृष्णकामिनी
जयति राधिका प्रेमसाधिका ।।3।।

सुकृतभूविभूतिश्च भूभृतां
विबुधसंविदेषा मतिःसताम्।
अगतिसद्गतिर्भा विभावतां
जयति राधिका प्रेमसाधिका ।।4।।

ललललामलीलाविलासिनी
चरमचर्च्यशोभाविभासिनी।
रसिकहृत्सरोजादिहासिनी
जयति राधिका प्रेमसाधिका ।।5।।

नहि विनास्ति कृष्णं च राधिका
नहि विनास्ति राधां च माधवः।
सततखेलना नित्यमेलना
जयति राधिका प्रेमसाधिका ।।6।।

सहजहासरासेश्वरी वरा
रुचिरराजराजेश्वरी परा।
रमणतत्परा सन्मनोहरा
जयति राधिका प्रेमसाधिका ।।7।।

कमलकोमलाङ्गा किशोरिका
चपलनन्दजेन्दोश्चकोरिका।
हृदि हरेर्नटन्ती मयूरिका
जयति राधिका प्रेमसाधिका ।।8।।

ललितलीलयैकाप्यनेकभा
यदुपतेरभिन्नापि भिन्नभा।
विमलगोपिकाभीष्टपोषिका
जयति राधिका प्रेमसाधिका ।।9।।

सुजनतोषिका श्रीशजोषिका
हृदयमोषिका रोषशोषिका।
मधुरघोषिका क्लान्तिकोषिका
जयति राधिका प्रेमसाधिका ।।10।।

शयनजागरापानभोजने
भ्रमणभाषणाद्यन्ययोजने।
विजलमीनवत्कृष्णकामुका
जयति राधिका प्रेमसाधिका ।।11।।