द्विजिह्वकुलभूषणा:

भिक्षाटनेन खलु जीवनयापकानां हस्ते कदापि पतितं नवराजपत्रम्। दृष्ट्वैव तत् विकटनर्तनदीक्षितास्ते भस्मासुरप्रियतमानुगतामवापु:।।1 विस्मृत्य पूर्वचरितं मदमत्ततायां स्वस्वामिनां सुचरितं मनसा निनिन्दु:। स्वोत्कृष्टभावविनिदर्शनमेव सर्वं मत्वा जगत्त्रयभुवामधिपा बभूवु:।।2 कस्यापि मानदलनेन निजप्रतिष्ठां मत्वा स्वबान्धवजनैस्सततं सयत्ना:। संस्कारसाररचनामपि वारबालां कृत्वात्मदुष्टचरितस्मयनं वितेनु:।।3 लोकाधिकारिगणतर्जनमेव मानं मत्वा तदीययशसि ज्वलनप्रवाहम्। प्रक्षिप्य लोकभवनांगणरक्षकानां दायित्वशिक्षणकलागुरवो बभूवु:।।4 एते द्विजिह्वकुलमौलिविभूषणा ये तेषां गतिर्भवितुमर्हति कीदृशीति। संचिन्त्य भिक्षुककलाकुशलावलीनां मिथ्यार्तभावमनिशं परिशोधयन्तु।।5