रविगीतम् (कजलीस्वरमयम्)

दाहक: प्रचण्डरश्मिभिर्दिवानिशं
रविर्दहत्यहो नृजीवनम्।।

शीतवायवो न वान्ति दीप्तवह्नयो ज्वलन्ति।
योषितो न यान्ति हा निजं महानसम्।
रविर्दहत्यहो नृजीवनम्।
दाहक:– १

पीनमाशका दशन्ति दीनबालका रुदन्ति
नीडशावका रुवन्ति हन्त सन्ततम्।।
रविर्दहत्यहो नृजीवनम्।
दाहक:—। २

कौति कोकिला द्रुमेषु रौति भ्रामर: सुमेषु।
नौति को जनो न मन्दिरं नवं नवम्।।
रविर्दहत्यहो नृजीवनम्।
दाहक:— ३

हाति नो कृशानुरेष पाति नो च शम्भुरेष।
याति कामिनी पितुर्गृहं निरन्तरम्।।
रविर्दहत्यहो नृजीवनम्।
दाहक:– ४

स्वेदबिन्दवो लसन्ति देहमेव निर्दहन्ति।
मानवा हरिं स्तुवन्ति भक्तिपूर्वकम्।।
रविर्दहत्यहो नृजीवनम्।
दाहक:– ५

ग्रीष्मताण्डवं विभाव्य दग्धकाव्यकृद् विहस्य।
विद्युतो गतिं विचिन्त्य नात्ति पायसम्।।
रविर्दहत्यहो नृजीवनम्।
दाहक:–।। ६