कामये वः शुभानि!
न याचे करोने! विमुक्तिं जगत्यां
न वा बन्धनं कर्मणां दर्शनीयम्।
परं शेषकर्मादिसम्पादनार्थं
शतं चायुषाम्मे समाः सम्प्रदेयाः।। १
न मे साहसं हर्तुमेवासि दक्षा
त्वदीयाक्रमं रे विजानामि सर्वम्।
ममास्ये$स्ति मास्कं करोने! नृहन्त्रि!
शिवश्चित्तवृत्त्यां च राराज्यते$स्याम्।। २
त्वदीयं कुचक्रं चलच्चक्रधारी
त्रिभङ्गी हरिष्यत्यहो मन्मथारी।
खरारिर्हरिर्मध्वरिः शूलधारी
जगद्रक्षकाः सन्ति देवाः प्रजानाम्।।३
करोने न जृम्भस्व देशे$स्मदीये
समाप्तिं गतं कुम्भपर्वाद्य सद्यः।
भुजङ्गप्रयातं परं वर्धते ते
अरे दानवेन्द्रोद्भवे याहि दूरम्।। ४
म्रियन्ते जनाः साम्प्रतं भारतीया
युवानः प्रवृद्धा असङ्ख्या विपन्नाः।
श्मशानं पुना रौति दृष्ट्वा शवं हा
परं नैव भीता वयं सावधानाः।। ५
जनाः सन्ति ये मास्कशून्याः स्वदेशे
विदेशे$थवा नैजगेहे वने वा।
द्रुतं स्वाननं येन केनापिधाय
पटेनाद्य जीवन्तु चिन्तादिशून्याः।। ६
प्रमादो न मास्काद् विधेयो भवद्भि-
र्भयं चैव कार्यं करोनाविषाणोः।
निजं जीवनं बान्धवानाममूल्यं
सदा रक्षणीयं हृदा प्रार्थये$हम्।।७
इदं चक्रमेकं करोनाप्रसूतं
न यावत्प्रयातीव दूरं सुदूरम्।
न तावद्भवन्तो मुदा मास्कमास्यात्
नयन्तु प्रियाः! कामये वः शुभानि।। ८
भुजङ्गप्रयाताङ्कहेतोः सुपद्यं
लिखन्त्वेव शीघ्रं तु कालानुरूपम्।
हरी रक्षको नः प्रजानामवश्य-
मितीत्थं सदा भावनां भावयन्तु।। ९
अगाधे समुद्रे तरन्तीव ये ये
प्रवात्याकुचक्रे$पि सुस्थाश्च ते ते।
ज्वत्कालवह्नौ प्रखेलन्ति वीरा
भवन्त्येव धीरा जिताकालपाशाः।। १०
*****************
ताण्डवं दृश्यते!
ताण्डवं दृश्यते ताण्डवं दृश्यते।
भारते साम्प्रतं ताण्डवं दृश्यते।। १
हिन्दुदेवापमानं खलैर्दर्श्यते।
बन्धवस्साम्प्रतं ताण्डवं दृश्यते।। २
हिन्दवो नैकतासूत्रसम्मानिनः।
तत्फलं साम्प्रतं ताण्डवं दृश्यते।। ३
संविभक्ता वयं वर्गभेदादिभिः।
यत्फलं साम्प्रतं ताण्डवं दृश्यते।। ४
पूजनीयाः प्रतीकाः शठैः खण्डिताः।
बान्धवा: साम्प्रतं ताण्डवं दृश्यते।। ५
कुत्सिता भावना दानवी वर्द्ध्यते।
अद्भुतं साम्प्रतं ताण्डवं दृश्यते।। ६
रक्षितुं नारविन्दोsनुरुन्धे भुवम्।
हा मुहुः साम्प्रतं ताण्डवं दृश्यते।। ७
धिक्कारश्चलचित्रसर्जनरतान् निर्देशकान् दुर्जनान्
देवान् हन्त निरन्तरं कलुषिता ये चित्रयित्वा ध्रुवम्।
धर्मान्धास्तु विदारयन्ति हृदयं देशे मुहुर्मादृशां
यस्माद् दृश्यत एव कोपजनितं रौद्रास्पदं ताण्डवम्।।
Facebook Notice for EU!
You need to login to view and post FB Comments!
