दीपगायत्री

गृहस्थान्तर्गृहस्थास्ते दीपा: दीव्युरहर्निशम्।
दिव्यप्रदीपपर्वणि ।।1।।

कवीनां काव्यदीपैस्त्वं लोकान्धन्तमांसि हर।
दीपत्वं सार्थकीकुरु।।2।।

पूजयित्वा निजं देवं शुभलक्ष्मलक्ष्मीनुतम्।
विद्धि सौख्यं प्रकाशकम्।।3।।

अतिक्राम्य प्रभापूर्यं सूर्यं  वियच्चेतसः।
दीपाः दिदीपिरे सदा।।4।।

असारा अपि तारास्तेsविद्योतन्त महाविले।
आत्मानं दीपमाख्यातुम्।।5।।

को नो समीहते लोके दिव्यं दीपायितुमहो।
कस्मै न रोचते द्युतिः? ।।6।।

व्योम्नि कादम्बिनी नेयं विद्युत्प्रदीपम्विना।
भाति क्षणमपि पश्य।।7।।

प्राणाश्चापि दीपकल्पाः जीवेष्विति मतिर्मम।
मृत्युहेतुरतैलता।।8।।

दद्याद्दीपावली दिव्या मानुषेभ्यो मनोद्युतिम्।
सत्त्वे प्राकाशिकी गतिः।।9।।

पञ्चविंशतिलक्षास्तेsदीप्यन्दीपाः धृतक्रमाः।
रघुवंशप्रदीपाः के?।।10।।

लोके दाशरथो दीपः प्रदीप्तो जायते यदा।
तदा नापेक्षितोsपरः।।11।।

मन्येsहं सागुणो भावो मृत्तिदीपैर्निबोध्यते।
आत्मारामो गुणातीतः।।12।।

नैर्गुणं बोद्धुमेवात्र सागुणी नु विभाविता।
अभेदो विभक्तो द्विधा।।13।।

द्वादशकलासम्पन्नो रामोsभिरामो हृदि।
जागर्ति दीपसन्निभः।।14।।

रामो विग्रहवान्धर्मः विख्यातमस्तीति धिया।
‘दीपावली’ धर्मपर्व।।15।।

देवानां मानुषं जन्म नृणां बोधाय केवलम्।
उच्चादर्शस्सदा मान्यः।।16।।

देवत्वं मानुषे देहे श्रद्धाभावेन भाव्यते।
श्रद्धयैव भगवान् रामः।।17।।

व्यक्तोsव्यक्तश्च नित्यं हि पारस्परमुपासेते।
नरो देवोsस्ति व्यक्तित्वात् ।।18।।

माययैव नरो देवः देवोsपि मायया नरः।
मायाsस्ति निर्मात्री शक्तिः।।19।।

कालशाणसमुल्लीढः त्रेतायाः पुरुषोत्तमः।
साम्प्रतं भगवान् रामः।।20।।

कृत्रिमे भक्तिभावेषु त्रेतायाः कल्पना वृथा।
स राम एक एवासीत्।।21।।

देहानुकरणे जातु जायते न रसोद्गमः।
“रसो वै सः” प्रसिद्धस्तु।।22।।

युगान्तस्स्यन्दिनीवैषा रामयात्रा विचारगा।
कालमप्यतिक्रामति।।23।।

नद्योsत्र सरयूशीलाः भवेयुरिति मे मतिः।
रामोsपि रमते तत्र।।24।।

सानन्दविग्रहो रामः नृमनोराज्यशासकः।
स्वार्थबुद्ध्या न बोध्योsसौ।।25।।

एकोsस्ति लोकसम्पूज्यः सद्देवो दीपपर्वणः।
रामः स्वाभिरामत्वात्।।26।।

रावणो रामरामेति संजपन्निव लोक्यते।
कलौ लीला नवालया।।27।।

प्रोत्पाट्य रावणीं बुद्धिं रामबुद्धिं विरोपयन्।
कः प्रवृत्तोsनुमार्गय।।28।।

सत्त्वस्नेहभराः दीपाश्ज्वलन्तीह यदा हृदि।
दीप्यन्ते रामचेतनाः।।29।।

गुरूणां हृदये शश्वत्प्रदीपाः ज्ञानभाषकाः।
भासन्ते तपःदीप्ताः।।30।।

मातापित्रोर्भावे स्नेहसन्निभस्तनयस्सदा।
ऋते स्नेहात् कुतो दीपः!।।31।।

शोभते लोकचित्तेषु प्रेम्णि प्राकाशिकी मति:।
श्रृङ्गारहारावलीव!।।32।।

यथा व्याकरणे स्फोटस्साहित्ये ध्वनिसंज्ञकः।
व्यञ्जनापि तथैव सः।।33।।

यथा काव्ये तथैवेह प्रतीतिर्व्यञ्जनाश्रया।
‘पटाखा’ व्यञ्जनामूला।।34।।

प्रोत्साहो मानसस्फोटो नृत्यगीतादिभिस्सृतः।
“पटाखा:” व्यञ्जकास्तथा।।35।।

द्रष्टुं लोकोत्तरान्भावान्नो लोकोsपि विहन्यते।
छिन्ने मूले कुतः फलम्! ।।36।।

व्याप्तस्तु मानुषो गन्धः यथा देहे तथापरे।
आत्मव्यक्तिर्हि सौरभम्।।37।।

काव्ये कान्तिरलङ्कारैराङ्गिकी प्रथिता मुहुः।
गुणैरात्मा चकास्ति ह।।38।।

सीम्नि नित्यं सुवीराणां जायते दीपपर्व च।
‘तोप’तापोज्ज्वलैर्दीपैः।।39।।

दत्तासुभ्योsपि नादैश्च भुशुण्डीकैस्समुत्थितैः।
मानमुच्चैः प्रदीयते।।40।।

राष्ट्रदीपशिखां नित्यं रक्षितुं येsप्यनालसाः।
त एव भाग्यशालिनः।।41।।

भेदबुद्धिमपाकृत्य जीवन्तु जीवनं समे।
दीपसौख्यमभेदेषु।।42।।

संस्कृतेर्विश्ववारायाः सौन्दर्यं मङ्गलम्भवेत्।।
विच्छित्तिः पर्वणां शक्तिः।।43।।

दीपाः समरसाः भूयाः भावाश्च समगामिनः।
भास्वरराष्ट्रहेतवे।।44।।

धूमारिन्दमञ्ज्योतिर्महतां मानसे यथा।
तथा लसेद्दीपपर्व।।45।।

नभोदीपास्तु देवेभ्यो यथाsत्रापि तथा भुवि।
शोभन्ते मृण्मयाः दीपाः।।46।।

रक्षताद्विक्षतेस्सर्वांस्तमोवक्षो विदार्य ह।
मङ्गलं दीपदीपनम्।।47।।

मङ्गलं विरचय्यात्र समेषां भाग्यकर्मणोः।
दीपपर्व शुभम्भूयात्।।48।।

मङ्गला दीपगायत्री चतुर्विंशाक्षरा मम।
समेषां  मङ्गलं कुर्यात्।।49।।

मङ्गलोद्दीपिनी वृत्तिर्विदध्यान्मङ्गलं सदा।
दीपपर्वणि मङ्गले।।50।।