प्रज्ञा प्रकाशन, सांचोर द्वारा प्रकाशित
दिसम्बर 2018
अंक -45

प्रधान संपादक : के.पी. 'अनमोल'
संस्थापक एवं संपादक: प्रीति 'अज्ञात'
तकनीकी संपादक : मोहम्मद इमरान खान

जयतु संस्कृतम्
शशिधरस्तोत्रम्
 
वन्दे शिवं शंकरम्
 
वन्दे भक्तसहायकं शुभकरं वन्दे महत्पक्षिणं
वन्दे पापहरं मृदुं वशकरं वन्दे महत्सिद्धिदम्।
वन्दे पट्टिशिनं गणं रुचिकरं वन्दे महच्छक्तिदं
वन्दे लोकहितं हरं शशिधरं वन्दे शिवं शंकरम्।।१।।
वन्दे ब्रह्मविदं भवं गुरुवरं वन्दे च गंगाधरं
वन्दे भूतनिषेवितं दधिपतिं वन्दे महायोगिनम्।
वन्दे हेमकरं यश: पणविनं वन्दे परब्रह्मगं
वन्दे लोकहितं हरं शशिधरं वन्दे शिवं शंकरम्।।२।।
वन्दे नन्दिकरं विभुं वधकिनं वन्दे प्रभावात्मकं
वन्दे भागकरं बलं गिरिरुहं वन्दे प्रशान्तं शुभम्।
वन्दे मन्त्रविदं हुतं बहुधरं वन्दे पिनाकधृषं
वन्दे लोकहितं हरं शशिधरं वन्दे शिवं शंकरम्।।३।।
वन्दे घोरतप: ध्रुवं सुखभरं वन्दे गुहावासिनं
वन्दे भावमयं लयं भयहरं वन्दे च मोदप्रदम्।
वन्दे गण्डलिनं प्रियं विषधरं वन्दे च नन्दीश्वरं
वन्दे लोकहितं हरं शशिधरं वन्दे शिवं शंकरम्।।४।।
वन्दे वाचसनं शुभं युगकरं वन्दे च भष्मावृतं
वन्दे नन्दिकरं कलिं गणपतिं वन्दे च हस्तीश्वरम्।
वन्दे पन्नगभूषणं सुवरदं वन्दे ग्रहाणां पतिं
वन्दे लोकहितं हरं शशिधरं वन्दे शिवं शंकरम्।।५।।
वन्दे कालहरं शनिं मृगधरं वन्दे च सत्यात्मकं
वन्दे कष्टहरं लघुं परिधिनं वन्दे सुधासेविनम्।
वन्दे दु:खहरं वधं पशुपतिं वन्दे सुरेशं शुभं
वन्दे लोकहितं हरं शशिधरं वन्दे शिवं शंकरम्।।६।।
वन्दे सिद्धबलं परं सुखकरं वन्देsम्बुजं निश्चलं
वन्दे विश्वहितं शुचिं सुरवरं वन्दे महाबन्धनम्।
वन्दे सत्यसनातनं सुफलदं वन्दे च विश्वेश्वरं
वन्दे लोकहितं हरं शशिधरं वन्दे शिवं शंकरम्।।७।।
वन्दे शुद्धमन: रविं सुरगुरुं वन्दे सुभक्तिप्रदं
वन्दे कामदहं बलं सुविपुलं वन्दे कृपादायकम्।
वन्दे पापविनाशिनं दिनकरं वन्दे च सिद्धेश्वरं
वन्दे लोकहितं हरं शशिधरं वन्दे शिवं शंकरम्।।८।।
एतच्छशिधरस्तोत्रं य: पठेच्छृणुयान्मुदा।
शंकरस्य कृपां प्राप्य वाधाभ्यस्स: प्रमुच्यते।।        

- डॉ. शशिकान्त शास्त्री
 
रचनाकार परिचय
डॉ. शशिकान्त शास्त्री

पत्रिका में आपका योगदान . . .
जयतु संस्कृतम् (3)